ВМРО-ДПМНЕ денеска преку прес-конференција упати остри критики до претседателот на СДСМ, Венко Филипче, во врска со неговите ставови за билатералниот спор со Бугарија.
Портпаролот на владејачката партија, Валентин Манасиевски, истакна дека опозицискиот лидер води политика која директно ги штети македонските државни интереси.
„Специјалниот бугарски пратеник во Македонија, Венко Филипче, треба веднаш да престане со водење на потчинета политика, односно политика која одговара на Бугарија, а штети на Македонија во нашиот билатерален спор“, рече Манасиевски.
Според партискиот портпарол, однесувањето на актуелното раководство на СДСМ предизвикува задоволство кај официјална Софија. Тој додаде дека ваквите чекори нанесуваат штета на самата опозициска партија.
„Од Бугарија се радуваат кога гледаат дека во Македонија има мала група на политичари, како што се СДС предводени токму од Венко Филипче, кои за власт би ги распродале и државните интереси. Проблемот кај оваа мала група на политичари како Венко Филипче кој е и уценет од Бугарија, е што води иста политика која е на иста линија со Румен Радев и со тамошните власти. Филипче води штетна политика која нанесува огромна штета на Македонија, но исто така му штети и нему, а и на СДС“, обвини портпаролот.
Од владејачката партија се осврнаа и на барањата за уставни измени кои секојдневно се пласираат во јавноста од страна на опозицијата.
„И додека поранешни негови соработници велат дека не треба секој ден да излегува на прес-конференции и да бара уставни измени бидејќи со тоа покажува колку е тој очаен и безидеен, уценетиот Венко Филипче пак и денес со сигурност ќе излезе на прес-конференција и ќе рече дека уставните измени се решението и веќе утре сме дел од ЕУ. Почитувани граѓани, На Бугарија не и се брза, тие декади чекаа да дојде некој како Зоран Заев, па не им е проблем повторно да чекаат некој сличен во случајот како Венко Филипче“, заклучи Манасиевски.