Пратеникот од редовите на ВМРО-ДПМНЕ, Миле Лефков, на денешната прес-конференција упати сериозни обвинувања до Советот на јавни обвинители, тврдејќи дека ова тело свесно го блокира расчистувањето на случајот „Мазут“.
Лефков директно го поврза претседателот на Советот со поранешни структури на извршната власт.
„Почитувани, Советот на јавни обвинители предводен од Башким Бесими, роднина на поранешниот функционер на ДУИ и поранешен министер за финансии, Фатмир Бесими, се стави во одбрана на обвинителите Абази и Коларевиќ за случајот „Мазут’’ вреден 167 милиони евра.“
Според пратеникот на владејачкото мнозинство, обвинителскиот систем се уште функционира под влијание на претходната власт.
„Советот на јавни обвинители не смогна сили да излезе од политичкото мочуриште со кое владее ДУИ, односно Али Ахмети и неговите партнери. Наместо да побараат детална истрага за овој случај кој е најголем во историјата од финансиски аспект, тие ги штитат пулените на ДУИ, молчат и седат на страна.“
Тој потенцираше дека ваквото постапување директно се одразува врз перцепцијата на граѓаните за правната држава.
„Со оваа потпора од страна на Советот на јавни обвинители, предводен од Башким Бесими, обвинители како Абази и Коларевиќ ќе бидат сликата на нашето правосудство. Компромитирани со лични и семејни врски со политичките партии СДС и ДУИ, кои ќе носат амнестија на осомничените уште пред да се најде во судска постапка одреден случај. Затоа и довербата во правосудните органи ќе биде и под 2%.“
Лефков потсети дека за случајот постојат официјални извештаи од други државни институции, но тврди дека тие намерно се игнорираат.
„Абази и Коларевиќ, кои се ставија на услуга на СДС и ДУИ, за да ги заштитат Васко Ковачевски, Асмир Јахоски и останатите осомничени, за кои целата јавност виде перење на пари, труење на народот и местење на тендери, за што има и докази поднесени од МВР, извештај од ДЗР, како и јавни сведоштва за тоа како биле правени јавните набавки за да може само една фирма да учествува на тендерот, само обвинителската коалиција на Абази и Коларевиќ не виде ништо, затоа што така им било кажано од Ахмети, Заев и Филипче.“
Прес-конференцијата беше заокружена со барање за итна одговорност и целосна ревизија на постапката.
„Бараме оставка од Абази и ревизија на целиот случај. Ваков епски криминал не смее да биде оставен под тепих, само затоа што осомничените се блиски до партиите СДС и ДУИ.“