Претседателот на СДСМ, Венко Филипче, на денешната прес-конференција упати јавно барање за извинување од страна на премиерот Христијан Мицкоски и партијата ВМРО-ДПМНЕ. Според него, актуелната власт ги добила изборите со лажна теза дека Социјалдемократскиот сојуз е предавник на македонскиот идентитет.
Филипче посочи дека иако претходно ветувале поништување на Преспанскиот договор, сега функционерите на ВМРО-ДПМНЕ јавно го прифаќаат како чин кој го зачувува идентитетот.
„Јавно го повикувам Христијан Мицкоски, носителот на оваа измислена лажна кампања, да излезе и да им се извини на сите граѓани на Македонија. Барам извинување за изгубените години, за сите навреди што ги претрпеа оние што го поддржуваа Социјалдемократскиот сојуз на Македонија“, изјави Филипче.
Лидерот на опозицијата нагласи дека Преспанскиот договор го гарантира македонскиот јазик и национален идентитет во целиот свет. Тој додаде дека сегашните министри и претседателката го користат уставното име на официјални средби, иако во кампањата тврделе дека никогаш нема да го изговорат.
Во однос на европскиот пат, Филипче истакна дека уставните измени не се ризик за идентитетот, туку прават јасна дистинкција меѓу македонскиот народ и бугарското малцинство. Тој заклучи дека СДСМ преговара со Европската Унија, а не со Бугарија.