Македонија денеска ќе направи значаен чекор во областа на вештачката интелигенција со официјалното лансирање на „Везилка“ – национална платформа што има за цел да го поттикне развојот и примената на современи AI-технологии во земјата.
Проектот го предводи Факултетот за компјутерски науки и инженерство при Универзитетот „Св. Кирил и Методиј“, во партнерство со Министерството за дигитална трансформација. „Везилка“ е дел од европската иницијатива за суперкомпјутерски и високоперформансни пресметувачки системи EuroHPC, а финансиски е поддржана преку програмата „Хоризонт Европа“ на Европската Унија.
Иницијативата е поврзана со грчкиот проект „Pharos“, со што Северна Македонија станува дел од пошироката европска мрежа за развој на доверливи и иновативни решенија базирани на вештачка интелигенција.
Од организаторите посочуваат дека еден од главните приоритети на проектот е развојот на дигитални ресурси и бази на податоци на македонски јазик, со што ќе се обезбеди поголема застапеност на локалните јазични и културни специфики во новите технолошки решенија.
Според нив, проектот ќе придонесе за побрза дигитализација на институциите, подобра употреба на податоците при носење одлуки, како и за отворање нови можности за научни истражувања, стартапи и технолошки компании. Дополнително, се очекува да ја зајакне соработката меѓу академската заедница, јавниот сектор, граѓанските организации и приватниот бизнис.
На промотивниот настан се предвидени обраќања на премиерот Христијан Мицкоски, министерот Стефан Андоновски, амбасадорот на Европската Унија Михалис Рокас, ректорката Биљана Ангелова, деканот Петре Ламески и координаторот на проектот Димитар Трајанов.
По официјалната презентација ќе се одржи панел-дискусија посветена на улогата на вештачката интелигенција во поттикнувањето на економскиот раст и развој.