Убодна рана со остар предмет во пределот на телото претрпел 37-годишен велешанец, откако неговата вонбрачна сопруга брутално го нападнала среде нивниот семеен дом во Велес.
Конфликтот помеѓу партнерите ескалирал во текот на вчерашниот ден, кога жената посегнала по остриот предмет и му нанела тешка повреда на мажот. Тој веднаш со возило бил пренесен во Општата болница во Велес за итно укажување лекарска помош.
Полицајците веднаш ја привеле 30-годишната велешанка, а против неа се подготвува соодветна кривична пријава за „обид за убиство при семејно насилство“ по член 123 во врска со член 19 од Кривичниот законик.
Полициските службеници на местото на настанот веднаш го пронашле и го одземале предметот со кој било извршено кривичното дело, а за случајот е известен и дежурен јавен обвинител.
- „На 06.07.2026 во 19:00 часот во Велес, полициски службеници од СВР Велес ја лишија од слобода 30-годишната Т.Д. од Велес, затоа што во домот со остар предмет му нанела убодна рана на нејзиниот 37-годишен вонбрачен сопруг. Повредениот бил пренесен во Општата болница во Велес за укажување лекарска помош, а Т.Д. била приведена и задржана во полициска станица. Од страна на полициски службеници предметот бил пронајден и одземен, известен е јавен обвинител и по целосно расчистување и документирање на настанот, против Т.Д. ќе биде поднесена кривична пријава за кривично дело „обид за убиство при семејно насилство“, казниво по член 123 во врска со член 19 од Кривичниот законик“, се наведува во официјалното соопштение на МВР.