Здравствените власти евидентираа вкупно 127 новопрегледани лица со симптоми на ентероколит кои за првпат побарале медицинска помош во текот на вчерашниот ден (26 јули 2026 година) во јавните здравствени установи во Гостивар. Како што информираат од Министерството за здравство, иако оваа бројка бележи благо зголемување во споредба со претходниот ден, таа и понатаму е значително помала од високите бројки регистрирани во изминатиот период.
Најголемиот дел од пациентите помош побарале во Општата болница „Д-р Ферид Мурад“, каде што притисокот сè уште е најизразен на педијатриското и на инфективното одделение.
Паралелно со болничките прегледи, дел од граѓаните со симптоми на ентероколит биле згрижени и во рамките на примарната здравствена заштита преку дежурните служби.
Од Министерството за здравство ја соопштија точната распределба на прегледите и новите хоспитализации во гостиварската болница:
„Во Општата болница „Д-р Ферид Мурад” Гостивар се регистрирани вкупно 91 нови прегледи, од кои 41 на инфективното одделение, 50 на педијатриското одделение.“
„На инфективното одделение е примен еден пациент на болничко лекување и еден е хоспитализиран на педијатриското одделение.“