Грчките власти воведуваат привремена забрана за движење на пешаци и возила во одредени шумски подрачја на Халкидики поради зголемениот ризик од пожари.
Оваа одлука следува по големиот пожар што избувна во Сивири, а мерките стапуваат на сила од петок, 14 август.
Ограничувањата ќе важат во делови од Касандра и Ситонија секојдневно во периодот од 8:00 до 20:00 часот.
Во општината Аристотелис, каде што ризикот е оценет како многу висок, мерката ќе биде во сила непрекинато до сабота до 8:00 часот.
Забраната ги опфаќа шумските зони на Касандра и Ситонија, како и подрачјата меѓу Комица и Уранополис и во близина на Стратони.
Полициски екипи ќе ги контролираат сите пристапи кон шумските патишта.
Секој што ќе биде затекнат во забранетите зони ќе мора веднаш да се оддалечи, а за непочитување на мерките е предвидена казна од 300 евра.
Исклучок од забраната важи само за волонтерите ангажирани во превенција и гаснење пожари.
За македонските туристи кои престојуваат или патуваат кон Халкидики се апелира редовно да ги следат официјалните известувања и евентуалните наредби за евакуација.