Македонските туристи кои викендов патуваат кон Грција се соочуваат со промени во сообраќајниот режим кај Солун, како и со сообраќајни и безбедносни ограничувања на Халкидики.
Поради изведба на работи од проектот „Fly Over“, обиколницата на Солун ќе биде целосно затворена за сообраќај во двата правци од сабота (1 август) во 23:00 часот до недела (2 август) до 05:00 часот наутро. За време на прекинот, возилата ќе се пренасочуваат низ градското подрачје.
Патниците кои патуваат кон Халкидики и аеродромот ќе минуваат низ центарот на градот, додека возилата што се движат кон граничниот премин Евзони ќе бидат насочувани по други градски сообраќајници. Метеоролошките и сообраќајните служби препорачуваат избегнување на шпиц-периодите од 07:00 до 10:30 часот и од 15:00 до 19:00 часот.
Паралелно со сообраќајните измени, воведени се и посебни забрани за движење на Касандра поради висок ризик од шумски пожари (индекс од трет степен).
Забраната за движење на пешаци и сите видови возила се однесува на следните шумски подрачја:
- Полуостров Касандра – потезот „Риџ Лајн“, од Касандра до Аја Параскеви
- Локацијата „Арапис“
- Локацијата „Халковуни“ во заедницата Паљури
На влезовите на овие шумски патишта ќе има засилени контроли од страна на грчката полиција. За непочитување на забраната за движење е предвидена административна казна во износ од 300 евра.