Бебе од Велика Британија ја изгуби битката за живот во болница, откако неколку дена помина на интензивна нега по извлекување од хотелски базен на Канарските Острови.
Инцидентот се случил во раните утрински часови на 15 јуни во станбен комплекс во Лахарес, село во северниот дел на Фуертевентура, каде девојчето било пронајдено како плови во водата. На местото на настанот била извршена реанимација поради срцев удар, по што детето со хеликоптер било префрлено во болницата во Гран Канарија во критична состојба. Лекарите не успеале да го спасат неговиот живот поради претрпено „неповратно невролошко оштетување“.
По трагичниот исход, Себастијан Кинтана, претседател на Организацијата за поморска безбедност на Канарските Острови, упати апел до јавноста:
„Со длабока тага, им испраќаме сочувство на нејзините родители и на целото семејство. Би сакал да ја искористам оваа можност да ги потсетам мајките и татковците на потребата секогаш да ги надгледуваат малите деца и да влегуваат во вода со нив“, рече Кинтана.
За случајот се огласи и портпаролот на регионалниот координативен центар за итни служби, кој ги објасни деталите за првичната интервенција:
„Детето, на возраст под една година, е во сериозна состојба откако беше реанимирано по кардиореспираторен застој и беше префрлено со медицински хеликоптер во Универзитетската болница за мајки и деца во Гран Канарија.“
Во дополнителното известување од итната служба беше прецизиран и моментот на пријавата:
„Околу 9:50 часот наутро на 15 јуни, добивме повик дека едно дете е извлечено од базенот во несвест, покажувајќи знаци на давење и има потреба од медицинска помош. Беше потврдено дека детето е во кардиореспираторен застој и започнавме со реанимација. За жал, не можевме да го спасиме животот на бебето“, рече портпаролот.
Истрагата на полицијата за точните околности под кои се случила оваа трагедија сè уште е во тек.