Тешко повредено 13-годишно дете се бори за живот по инцидент што се случил во скопската населба Чаир, дознава Телма.
Според информациите до кои дошла телевизијата, детето било избодено со нож за време на тепачка на улицата „Македонско-косовска бригада“ и се наоѓа во исклучително тешка здравствена состојба.
Во инцидентот, според извори од Министерството за внатрешни работи за Телма, учествувале пет лица – четворица малолетници и едно полнолетно лице. Во пресметката биле употребени ножеви и безбол-палки.
Еден од малолетниците, роден во 2012 година, признал дека користел нож. Сепак, треба да се утврди дали токму со тој предмет му биле нанесени повредите на 13-годишното дете.
Неговиот брат, роден во 2007 година, засега одбива да даде исказ.
Полицијата работи на целосно расчистување на случајот и утврдување на улогата на секој од учесниците. Се преземаат активности за поднесување кривична пријава за обид за убиство, но конечната правна квалификација на делото ќе ја утврди надлежното обвинителство.