Сопственичка на градинка во кинеската покраина Гансу е осудена на доживотен затвор за труење на повеќе од 200 деца и вработени со храна контаминирана со олово, додека уште петмина вработени добија затворски казни.
Ли Хуифанг, која ја водеше градинката „Хеши Пеиксин“ во градот Тјаншуи, беше прогласена за виновна за производство и продажба на отровна и штетна храна. Судот во Ланжоу дополнително нареди конфискација на нејзиниот имот во вредност од 500.000 јуани (околу 66.500 евра), објави државната телевизија CCTV.
Извршната директорка на градинката, Џи Џинглин, беше осудена на 15 години затвор и парична казна од 300.000 јуани (околу 40.000 евра), додека четворица вработени во кујната беа осудени на затворски казни од шест до осум години.
Според наодите на судот, персоналот во кујната користел нејадливи бои за да го подобри изгледот на оброците и да привлече повеќе деца, иако производот бил јасно означен како ненаменет за консумирање. Судот утврдил дека сопственичката и директорката им наредиле на вработените да додаваат отровни и штетни состојки во храната.
Случајот беше откриен во јули 2025 година, кога кај 247 деца и персонал беа измерени ненормално високи нивоа на олово во крвта. Истрагата започна откако 235 деца беа третирани за труење со олово по консумирање парени колачи од урми и лепчиња од колбаси и пченка.
Анализите покажаа дека колачите содржале 1.052 милиграми олово на килограм, а лепчињата 1.340 милиграми на килограм, што е за повеќе од 2.000 пати над дозволената граница за безбедност на храната во Кина од 0,5 милиграми на килограм.
Истрагата дополнително откри дека десетици локални службеници и вработени во болницата се обиделе да го прикријат случајот преку манипулирање со резултатите од крвните тестови и примање мито од еден од инвеститорите на градинката.
По овој случај, Кина издаде нови национални упатства за исхрана во образовните институции, кои вклучуваат задолжително тестирање на секоја нова пратка храна и набавка на основните намирници исклучиво преку централизирани центри.