Православните христијани утре го одбележуваат празникот Светите седум маченици Макавеи, ден со кој официјално започнуваат Богородичните пости.
Според црковното предание, празникот е посветен на седумте браќа Авим, Антонин, Гуриј, Елеазар, Евсевон, Алим и Маркел, нивната мајка Соломонија и свештеникот Елеазар, кои пострадале со маченичка смрт околу 180 години пред Христа за зачувување на својата вера под притисок на сирискиот цар Антиох.
Во македонската народна традиција овој ден се смета за голем и тежок празник во кој не се работи, а за деновите поврзани со него се врзани низа верувања и обичаи. Според нив, се предвидува какво ќе биде времето во текот на наредните шест месеци или за целата година, каде што еден ден одговара на еден месец.
Етнографските записи забележуваат дека од овој ден времето почнува да се завртува кон зима, а птиците преселници започнуваат да се подготвуваат за заминување во потоплите краишта.
Во зборникот на браќата Миладиновци е забележано народното верување за овие денови:
„Првите дванаесет дни од Августа се викает Моринки. Тие дни жените не работает, ни перат, ни деца к’пат. На тие дни гатает за доброто или лошото време за цела година; ако на пр. првиот ден од Августа чинит горештина, коложек (јанвар) ќе бидит студен, и напротив; ако на вториот правит добро време, на сечка (феврал) ке чинит лошо; и така за другите.“