Традиционалниот спортско-рекреативен настан „Прв до врв“, во организација на Здружението за спорт и рекреација „Прв до врв“ – Скопје, утре ќе го доживее своето четиринаесетто издание. Настанот, кој секоја година привлекува голем број ентузијасти, вклучува велосипедска трка и планинарска тура кои ќе предизвикаат привремени измени во секојдневното одвивање на сообраќајот во главниот град.
Велосипедистите ќе стартуваат во 09:45 часот, додека планинарите ќе тргнат во 10:00 часот, а двете групи како крајна цел го имаат Милениумскиот крст.
„Во рамки на настанот ќе се реализира велосипедска трка со почеток во 09:45 часот, со траса на движење од пред Музеј на град Скопје по ул. „Св. Кирил и Методиј“, лево по бул. „Св. Климент Охридски“, право по бул. „Мајка Тереза“, лево по ул. „Тодор Александров“, а потоа по локалниот пат кон Средно Водно и до врвот на Водно (Милениумски крст). Воедно, со почеток во 10:00 часот ќе се одржи и планинарска тура, која ќе стартува пред ООУ „Кочо Рацин“ на бул. „Мајка Тереза“, ќе продолжи по ул. „Тодор Александров“, а кај ул. „Салвадор Аљенде“ учесниците ќе се движат десно по планинската патека кон Средно Водно и понатаму кон врвот на Водно (Милениумски крст).“
Поради масовноста на настанот и заштита на безбедноста на сите учесници, полицијата најави дека сообраќајот на овие потези ќе биде целосно пренасочен.
„Поради одржувањето на настанот, Одделението за безбедност на патниот сообраќај при СВР Скопје ќе преземе мерки за посебен режим на сообраќај, при што сообраќајот ќе се пренасочува по околните сообраќајници. Министерството за внатрешни работи апелира до граѓаните да ги почитуваат наредбите и насоките што ќе ги издаваат полициските службеници на сообраќајниците каде што ќе се одвива настанот, со цел непречено и безбедно реализирање на истиот.“