Жителите на западна Европа, Северна Америка и делови од Арктикот во среда, на 12 август, ќе имаат можност да го набљудуваат првото целосно помрачување на Сонцето на европскиот континент во последните 27 години.
Главниот појас на тоталитет ќе премине преку Гренланд, Исланд, Шпанија и Балеарските Острови, каде што Месечината целосно ќе го покрие сончевиот диск и ќе овозможи гледање на сончевата корона со голо око.
За разлика од овие региони, набљудувачите од Скопје и Македонија ќе имаат поинакво искуство. Поради специфичниот агол и ниската позиција на Сонцето на западниот хоризонт во доцните попладневни часови, во главниот град ќе се забележи само минимално делумно помрачување непосредно пред залез, кое ќе биде речиси незабележливо за голо око.
Аголот на гледање од Балканот е исклучително неповолен во споредба со југозападните делови на Европа. За разлика од Британија и Ирска каде што покриеноста ќе достигне и до 98 проценти, или Шпанија каде што ќе владее тотално помрачување, во Скопје појавата ќе бара специјална астрономска опрема или заштитни филтри.
Астрономите предупредуваат дека дури и при минимална покриеност од неколку проценти, директното гледање кон Сонцето без сертифицирани очила со ISO 12312-2 стандард или соодветни методи за проекција може да предизвика трајни оштетувања на видот.
За сите љубители на астрономијата во Скопје и низ државата, вистинската прилика за незаборавна глетка ќе пристигне релативно брзо, односно на 2 август 2027 година.
За време на следното помрачување, чија патека на тоталитет ќе премине низ јужна Шпанија, Северна Африка и Блискиот Исток во времетраење од над шест минути, позицијата на Македонија ќе биде значително подобра. Во 2027 година од Скопје во средината на денот ќе се набљудува исклучително високо ниво на делумно помрачување.