Уставниот суд на Република Северна Македонија започнува со најголемата реформа во областа на транспарентноста од своето постоење. Почнувајќи од 4 март, јавноста за првпат ќе може во живо да ги следи седниците преку официјалната веб-страница и дигиталните канали на Јутјуб и Фејсбук.
Од Судот посочуваат дека со овој потег се отвора ново поглавје во односот со граѓаните, кои ќе можат во реално време да ги видат расправите и аргументите при носењето на клучните одлуки за државата.
„Оваа одлука претставува круна на повеќегодишниот процес на постепено спроведување на Програмата за управување со комуникациите. Секој граѓанин ќе може да види како се гради правното мислење и каква е атмосферата во која се носат одлуките од суштествено значење за правниот поредок“, соопштуваат од Уставниот суд.
Како дел од реформите, претседателот на Судот ќе организира и директни средби со граѓаните секој прв четврток во месецот, почнувајќи од 5 март 2026 година.