Словенија синоќа беше погодена од силен бран на невреме со урагански ветер и силен град, што предизвика колапс во електроенергетската мрежа и поплави во повеќе региони низ земјата.
Центарот за известување при Управата за заштита и спасување на Република Словенија соопшти дека се извршени повеќе од 400 спасувачки интервенции, со учество на дури 161 пожарникарска единица на критичните точки.
Најкритично било во главниот град Љубљана со 152 пријавени случаи на штети, во Крањ каде се регистрирани 102 интервенции, како и во Целје со 39 спасувачки акции.
Најзасегнати подрачја се општините Коменда и Церкље во Горенскиот регион. Снимки од значајни штети предизвикани во селото Клањец објави и министерот за земјоделство, Јанез Циглер Крал.
Утринава пошироката околина на Љубљана и понатаму е без напојување со електрична енергија, а пријавени се и сериозни штети на јавни објекти каде водата навлегла во училишни и спортски сали.
Во Горењскиот регион ветерот ги однел покривите на неколку згради, а противпожарните екипи во моментов работат на расчистување на патиштата од паднати дрвја и испумпување на водата со цел да се спречат дополнителни материјални загуби за граѓаните.