„Украинските сили регистрираа нарушувања на нашиот воздушен простор од страна на извидувачки дронови, кои веројатно се унгарски. Прелиминарните проценки сугерираат дека тие можеби вршеле извидување на индустрискиот потенцијал на пограничните области на Украина. Наредив да се проверат сите достапни информации и итно да се достават извештаи за секој регистриран инцидент“, рече Зеленски во објава на социјалната мрежа X, по состанокот со Врховниот командант на вооружените сили на Украина, Олександр Сирски.
Сирски, исто така, го информираше Зеленски за соборувањето на рускиот воен авион Су-34 во регионот Запорожје.
„Им се заблагодарувам на нашите воини за нивната точност. Овој авион, заедно со другите, го користеа Русите за фрлање воздушни бомби врз Запорожје и други украински градови и села. Ќе продолжиме праведно да ја уништуваме руската воена авијација како одговор на нападите врз нашите градови и нашиот народ“, рече Зеленски. На состанокот присуствуваа и началникот на Генералштабот Андриј Хнатов, министерот за одбрана на Украина Денис Шмихал и заменик-шефот на претседателската администрација задолжен за одбранбени работи Павло Палиса.