Воените сили на Украина во текот на ноќта и утринските часови извршија координирани напади со дронови и ракети врз повеќе руски градови и стратегиски региони, соопштија официјалните руски власти.
Според првичните извештаи, на удар се најдоа Москва, Чебоксари, Новокујбишевск, Ростовската област, како и витални инфраструктурни објекти во Владимирската област.
Соборени летала во околината на Москва
Силите за противвоздушна одбрана на руското Министерство за одбрана во текот на целата ноќ биле активни во поширокиот реон на главниот град.
„Одбиен е напад од четири дрона во самиот град, а во текот на ноќта и утрото на поширокото подрачје беа соборени вкупно 12 украински беспилотни летала. Службите за вонредни состојби работат на местото на падот“, соопшти градоначалникот на Москва, Сергеј Собјанин.
Ракетен удар во Чувашија
Најкритична е состојбата во Чебоксари, каде што украинските сили употребиле тешко ракетно вооружување.
„Шефот на Чувашката Република, Олег Николаев, соопшти дека Чебоксари бил погоден од ракетен напад и оти бројот на жртви и оштетени објекти сè уште се утврдува. Во регионот и понатаму е активна ракетната закана.“
Пожари на инфраструктурата
Нападот предизвика сериозни штети и пожари во Владимирската и Самарската област. Во Каменсковскиот и Александровскиот округ горат два инфраструктурни објекти, додека во Новокујбишевск дрон паднал во круг на локално претпријатие предизвикувајќи пожар.
Во Ростовската област, по неколкучасовна борба со огнот, ситуацијата е ставена под контрола откако претходно беше запален резервоар за гориво во цивилен објект.