Времето во текот на претстојниот викенд ќе биде променливо облачно, но со повремени сончеви периоди. Сепак, граѓаните треба да се подготват за засилен ветер и нови врнежи кои се очекуваат веќе од почетокот на следната недела.
Според Управата за хидрометеоролошки работи (УХМР), денеска ќе преовладува слично време, со услови за локален дожд во јужните делови.
„Ќе дува умерен, повремено засилен ветер од северен правец. Максималната температура ќе биде во интервал од 18 до 25 степени Целзиусови“, информираат од УХМР.
Во Скопје денеска ќе биде променливо облачно со подолги сончеви периоди и температура до 24 степени. Понеделник навечер носи нова промена со дожд, која ќе продолжи и во вторник, кога се очекуваат и грмежи.