Софиското градско обвинителство отвори истрага за предумислено убиство по смртта на 56-годишниот бизнисмен Владимир Јанков, чие тело било пронајдено во неговиот изгорен семеен дом во Банкија, во близина на Софија.
Случајот го презеде надлежното обвинителство веднаш по завршувањето на првичниот увид на местото на настанот.
Телото на Јанков било откриено во понеделникот (27 јули 2026 година) во раните утрински часови, околу 04:14 часот, кога противпожарните екипи пристигнале на терен по пријава за пожар. При интервенцијата, екипите наишле на сомнежи кои укажувале дека не станува збор само за несреќен случај.
Основната верзија на која работат истражителите е дека пожарот бил намерно подметнат по извршеното убиство, со цел да се уништат трагите и доказите за злосторството. Од противпожарната служба исто така потврдија дека постојат индиции оти огнот бил намерно предизвикан.
Надлежните органи вршат детална анализа на материјалните докази и сослушуваат лица кои би можеле да помогнат во откривањето на сторителот и мотивот.
Дел од бугарските медиуми објавија неофицијални информации дека мотивот за убиството е евентуална кражба на поголема сума пари од криптопаричникот на Јанков. Сепак, обвинителството засега не ги потврдува овие наводи и информира дека се проверуваат сите можни верзии во рамки на истрагата.