Дваесет и петгодишниот Т.Б., кој е осомничен за свирепото убиство во општина Старо Нагоричане, е спроведен во затворот „К’шање“ во Куманово на издржување 30-дневен притвор. Од затворот информираат дека по извршениот лекарски преглед, лицето е во добра здравствена состојба.
Истрагата за овој случај се проширува откако обдукцијата на втората жена, за која беше нареденa ексхумација, потврди дека станува збор за насилна смрт.
„Станува збор за насилна смрт и кај втората помлада жена за која обвинителството побара ексхумација“, изјави директорот на Судска медицина, проф. д-р Александар Станков, додавајќи дека се земени ДНК примероци од двете жртви.
Обвинителството во наредните денови ќе наложи психијатриска процена на Т.Б. од страна на експерти од Клиниката за психијатрија. Истражните органи испитуваат дали истиот сторител е поврзан со повеќе убиства поради сличности во суровиот начин на извршување на делата.