Посетителите на скопската Зоолошка градина деновиве можат да ја видат малата Делфина како си игра со својата нова играчка – плишан орангутан, подарок од редовна гостинка. Но, зад оваа симпатична глетка се крие една од најтрогателните приказни за борбата за живот и човечката посветеност.
Пред четири години, Делфина беше отфрлена од својата мајка и падна во езерото во Зоолошката. Нејзиниот живот беше спасен буквално во последен момент, а оттогаш, зоонегувателката Зера стана нејзина втора мајка. Даноноќната грижа (24/7) се исплатеше.
Денес, Делфина не само што е жива и здрава, туку доби и друштво – нејзиното помало братче Мики. Тимот на ЗОО Скопје направи вистински подвиг од светски размери, успевајќи да ги спои двете мали човеколики мајмунчиња и постепено да ги навикнува на самостоен живот, нешто што многу ретко им успева дури и на најголемите светски зоолошки центри.