Туристичката комора при Сојузот на стопански комори на Македонија (ССКМ) испрати официјално барање до Министерството за туризам на Грција, со кое се бара привремено одложување на примената на новиот систем за влез и излез (ЕЕС) на граничните премини за македонските државјани. Од Комората бараат системот да не се применува во периодот од 1 јуни до 1 септември 2026 година.
Барањето е резултат на реакциите од туристичкиот сектор, каде се предупредува дека имплементацијата на дигиталната регистрација во ек на летната сезона може да предизвика повеќечасовни задржувања на границите. Ова, според експертите, би имало негативни последици за туристичкото искуство, но и ризик од откажување на веќе резервираните аранжмани.
„Грција е традиционално најзначајна туристичка дестинација за граѓаните на Македонија, а непречениот проток на патници е од суштинско значење за одржување на стабилноста и развојот на туристичката индустрија. Затоа, бараме разбирање и разгледување на можноста за временско одложување на имплементацијата на системот во текот на најфреквентниот период“, се наведува во соопштението од Туристичката комора.
Од таму додаваат дека иницијативата има за цел зачувување на економската соработка. Новиот систем ЕЕС, кој стапи на сила на 10 април, предвидува дигитална регистрација со фотографирање и земање отпечаток од прст, што веќе предизвика застои на граничниот премин „Богородица“.