Турската метеоролошка служба издаде „жолта“ тревога за дури 48 од вкупно 81 провинција во земјата, предупредувајќи на опасни временски услови кои вклучуваат силни бури, обилни дождови и висок ризик од лавини. Властите апелираат граѓаните да не патуваат освен ако тоа не е апсолутно неопходно.
Најкритично е во регионите на Мармара и Егејското Море каде се очекуваат удари на ветер со јачина до 90 км/ч, што веќе предизвикува страв од паѓање дрвја, уривање на покриви и прекини во морскиот и воздушниот сообраќај. Во источните делови, пак, главната закана се лавините.
Драматични сцени веќе пристигнуваат од југоистокот на земјата. Во провинцијата Хаќари, две студентки биле затрупани од голема количина снег што паднал од покрив на студентски дом. За среќа, брзата реакција на нивните колеги ги спасила, а по укажаната лекарска помош, нивната состојба е стабилна. Во областа Шемдинли, снегот од покривите урнал електрични столбови, оставајќи цели населби во мрак, додека спасувачките екипи откопуваат автомобили заглавени под лавини на автопатите.
Метеоролозите не носат добри вести ниту за наредните денови – од понеделник се очекува нов студен бран од Балканот и Сибир, кој ќе донесе уште пообилни снежни врнежи и температури длабоко под нулата.