Националната конвенција за Европската унија во Република Северна Македонија (НКЕУ-МК) денеска во Клубот на пратеници ја одржува 75. дијалог-сесија, посветена на придонесот на структурираниот дијалог во евроинтегративниот процес.
На отворањето се најавени обраќања на министерот за внатрешни работи Панче Тошковски, министерот за правда Јетон Шасивари, амбасадорката на Словачка Ивета Хрицова и извршната директорка на Словачката асоцијација за надворешна политика, Јитка Иванчикова.
Во рамки на настанот ќе биде потпишан и меморандум за соработка меѓу Министерството за внатрешни работи и Европското движење во Република Северна Македонија, како носител на НКЕУ-МК.
Програмата предвидува три панел-дискусии, посветени на клучни области од процесот на европска интеграција.
Првиот панел ќе се фокусира на правосудството и темелните права, односно Поглавје 23. Вториот ќе биде посветен на правдата, слободата и безбедноста, во рамки на Поглавје 24.
Третата дискусија ќе се однесува на борбата против корупцијата, со осврт на Поглавјата 5, 18 и 32.
На панелите ќе учествуваат претставници на институциите, дипломати, обвинители, судии, професори, експерти и претставници на граѓанскиот сектор.