Вистинска драма се одвивала на панаѓур во Хамбург, каде што 23 лица останале заглавени на голема вртелешка и речиси три часа виселе на околу 30 метри над земјата.
Возењето, кое вообичаено трае само неколку минути, се претворило во повеќечасовно чекање откако атракцијата ненадејно се заглавила.
На местото веднаш пристигнале неколку полициски и противпожарни екипи. По повеќечасовната интервенција, нешто по полноќ механизмот бил отклучен, а патниците успеале безбедно да ги напуштат седиштата. Никој не бил повреден.
Полицијата во Хамбург соопшти дека е започната истрага и техничка проверка за да се утврди што точно го предизвикало дефектот.
Инцидентот се случил на „Сомердом“, големиот летен панаѓур во Хамбург, каде што вртелешката е една од повеќето атракции. Настанот трае до недела, а минатата година го посетиле повеќе од 1,3 милиони луѓе.