Потпретседателката на СДСМ, Јована Тренчевска, на гостувањето во „Топ тема“ на Телма ја обвини власта дека наместо со реформи и решенија на проблемите во економијата, се занимава со лажен пиар, клевети на опозицијата и манипулации.
„Освен со лаги и манипулации, со друго ништо ВМРО не се занимава како политичка партија. Не испорачуваат никакви реформи во државата, она што го очекуваат граѓаните, ништо“, потенцираше Тренчевска.
Тренчевска посочи дека државата повторно се движи кон целосна партизација, потенцирајќи дека со ВМРО на власт има заробена држава.
„Имаме правосудство коешто е под целосна контрола на власта. Контрола над правосудните органи, над обвинителството и над судовите. Имаме полиција којашто, наместо да е во служба на граѓаните, е во служба на ВМРО. И тоа народот веќе го препознава, затоа и рејтингот на ВМРО на сите анкети покажува дека губите 150.000, па и 200.000 гласови, а Социјалдемократскиот сојуз ја зголемува довербата кај граѓаните“, рече Тренчевска.
Владата нема ништо направено за реформската агенда за ЕУ додаде Тренчевска.
„Ништо нема испорачано владата. Роковите беа до јуни 2025-та, па се пролонгираа до декември 2025-та, и сега последното пролонгирање на роковите е јуни 2026 година“, посочи Тренчевска.
Тренчевска порача дека СДСМ останува на страната на европската иднина и стратешките интереси на државата.
„За ВМРО ние сме предавници, а тие големи патриоти. Зошто? Затоа што ние ја внесовме земјата во НАТО, затоа што завршивме голем дел од обврските во делот на евроинтеграциите и затоа што сакаме младите да ни останат тука, затоа што сакаме да живееме како дел од европското семејство. Затоа што сакаме во ЕУ, а со оваа власт не одиме во ЕУ, нема Европа. “, рече потпретседателката на СДСМ, Јована Тренчевска.