Малопродажните цени на нафтените деривати од ноќеска на полноќ во просек се зголемуваат за 4,89 проценти, одлучи Регулаторната комисија за енергетика, водни услуги и услуги за управување со комунален отпад (РКЕ).
Според новата одлука, бензините ЕУРОСУПЕР БС-95 и ЕУРОСУПЕР БС-98 поскапуваат за 3,00 денари по литар, додека најголемо зголемување има кај дизелот и маслото за домаќинство. Цената на ЕУРОДИЗЕЛ (Д-Е V) се зголемува за 6,00 денари, а на Екстра лесното масло за домаќинство за дури 8,00 денари по литар.
Од 8.9.2026 година од 00:01 часот максималните цени на нафтените деривати ќе изнесуваат:
- Моторен бензин ЕУРОСУПЕР БС – 95: 97,00 (денари/литар)
- Моторен бензин ЕУРОСУПЕР БС – 98: 99,00 (денари/литар)
- Дизел гориво ЕУРОДИЗЕЛ БС (Д-Е V): 101,00 (денари/литар)
- Масло за горење Екстра лесно 1 (ЕЛ-1): 105,00 (денари/литар)
- Мазут М-1 НС: 46,001 (денари/килограм)
Малопродажната цена на Мазутот М-1 НС се зголемува за 1,591 ден/кг.
Од РКЕ појаснуваат дека зголемувањето се должи на повисоките референтни цени на светските берзи и курсот на денарот.