Малопродажните цени на нафтените деривати од полноќ се зголемуваат во просек за 2,62 отсто во однос на претходната одлука, соопшти Регулаторната комисија за енергетика, водни услуги и услуги за управување со комунален отпад (РКЕ).
Најголемо зголемување има кај дизел горивото, чија цена се зголемува за 3,50 денари по литар и ќе изнесува 101,50 денари.
Бензините ЕУРОСУПЕР БС-95 и ЕУРОСУПЕР БС-98 поскапуваат за 1,50 денари по литар. Новата цена на ЕУРОСУПЕР БС-95 ќе изнесува 93,00 денари/литар, додека ЕУРОСУПЕР БС-98 ќе се продава по цена од 95,00 денари/литар.
Екстра лесното масло за домаќинство (ЕЛ-1) поскапува за 2,00 денари по литар и неговата нова цена ќе биде 100,50 денари/литар.
Малопродажната цена на Мазутот М-1 НС се зголемува за 1,850 ден/кг и ќе изнесува 45,576 денари за килограм.
Од РКЕ информираат дека зголемувањето се должи на повисоките референтни цени на нафтените деривати на светскиот пазар, каде бензините забележале раст во просек за 3,795%, дизелот за 4,842%, екстра лесното масло за 3,958% и мазутот за 6,467%. Курсот на денарот во однос на доларот е понизок за 0,5340%.
Новите цени стапуваат на сила од 25.8.2026 година од 00:01 часот.