Транспортниот сектор од земјите од Западен Балкан најави протест и блокада на дел од граничните и железничките терминали кон Европската Унија на 14 септември, поради ограничувањата за престој во Шенген-зоната.
Претседателот на српското Здружение на транспортери „Меѓународен транспорт“, Неѓо Мандиќ, изјави дека превозниците нема да се откажат од акцијата бидејќи досега не е постигнато решение со европските институции. Главниот проблем е правилото „90 дена во 180 дена“, кое ги ограничува професионалните возачи без друг основ за престој.
Транспортерите укажуваат дека ова ограничување не ја зема предвид специфичноста на нивната професија и бараат посебен статус. Дополнителна загриженост предизвикува и електронскиот Систем за влез/излез (EES), со кој попрецизно ќе се контролира престојот. Во случај на пречекорување на дозволениот рок, возачите ризикуваат враќање во матичната земја, додека камионот и товарот би останале на граничниот премин.
Од Европската комисија наведуваат дека се запознаени со проблемот, но дека најавениот протест нема да доведе до промена на постојниот режим. Портпаролот Маркус Ламерт изјави дека Брисел признава дека одредени професионални категории имаат потреба од подолг пристап до Шенген-зоната, но засега нема конкретни чекори за измена на правилата.
„Не можеме повеќе да чекаме“, порача Мандиќ, нагласувајќи дека транспортерите ќе останат на своите барања доколку не биде понудено соодветно решение. Доколку се реализираат блокадите на 14 септември, се очекуваат сериозни застои во товарниот сообраќај и испораката на стока кон ЕУ.