Американскиот претседател Доналд Трамп упати критики кон дел од европските членки на НАТО, наведувајќи дека Соединетите Американски Држави со години го носат главниот товар во рамки на Алијансата, додека, според него, одредени сојузници не придонесуваат во иста мера.
Во изјава пред новинарите во Белата куќа, дадена во пресрет на средбата со генералниот секретар на НАТО, Марк Руте, Трамп порача дека САД имаат потрошено „трилиони долари“ за заштита на Европа, оценувајќи ја Америка како „доминантна членка“ на Алијансата.
-„Потрошивме трилиони долари за да ја заштитиме Европа. Кога ние побаравме помош, нив ги немаше. Тоа е глупаво“, рече Трамп.
Тој воедно упати и критики кон британскиот премиер Кир Стармер, тврдејќи дека не покажал доволно подготвеност за поддршка.
Американскиот претседател ги посочи Италија и Германија како земји кои, според неговите оценки, не ги исполниле очекувањата на Вашингтон во рамките на НАТО.