Американскиот претседател Доналд Трамп побара сојузната држава Ново Мексико веднаш да се преименува во „Нова Америка“, што претставува најнов во низата негови иницијативи за менување на географските називи во земјата.
„Ново Мексико треба веднаш да го промени своето име во Нова Америка. Ние не сме Мексико, ние сме Соединетите Американски Држави!“, напиша Трамп на социјалната мрежа Truth Social пред заминувањето на предизборен митинг во Канзас.
Иницијативата за преименување на Ново Мексико, каде што Трамп ги загуби изборите во 2024 година со разлика од шест процентни поени, доаѓа во период кога републиканците се соочуваат со загриженост за нивното мнозинство во Конгресот пред претстојните избори во ноември.
Според последните анкети, дел од гласачите сметаат дека претседателот недостасува со фокус врз клучните проблеми во земјата. Сепак, Трамп тврди дека евентуалната промена на името ќе донесе економски бенефит, наведувајќи дека „вредноста на недвижностите и приходите би се зголемиле“.
Во истата објава тој повторно се осврна и на изборниот систем.
„Можеби дури и корумпираните избори по кои е познато Ново Мексико повторно би станале фер!“, додаде Трамп.
Предлозите за промена на географски имиња не се новост за Трамп. Минатиот август тој потпиша извршна наредба за преименување на езерото Онтарио во „Американско езеро“ во контекст на трговските односи со Канада, додека претходно го преименуваше Мексиканскиот Залив во „Американски Залив“ и во неколку наврати предложи Ормутскиот теснец да се нарекува „Трампов теснец“.
Сепак, иако претседателот на САД ги поседува овластувањата за менување на имињата на водните површини и географските објекти во Информативниот систем за географски имиња, според Американскиот Устав тој нема законска надлежност самостојно да го смени името на некоја сојузна држава, бидејќи таквата одлука мора да биде донесена на ниво на самата држава.
Името Ново Мексико датира уште од 16 век, односно од период кој претходи на формирањето на Соединетите Американски Држави, стои во официјалните документи на Бирото за индијански прашања.