Американскиот претседател Доналд Трамп денес изјави дека Иран е во сериозна политичка и економска криза, предупредувајќи дека САД ќе „удрат многу силно“ ако иранските власти продолжат со насилство врз демонстрантите.
Во интервју за радио емисијата на американскиот новинар Хју Хјуит, тој им рече на иранските власти дека „јасно ставил до знаење“ дека ќе платат „висока цена“ ако продолжат да убиваат цивили за време на протестите.
- Јасно им ставивме до знаење дека ако почнат да убиваат луѓе, ќе ги удриме многу силно – рече Трамп. Тој додаде дека ја следат ситуацијата „многу внимателно“ и дека до Техеран е испратена порака, дури и посилна од јавната, дека во случај на крвопролевање, „ќе мора да платат висока цена“.
Кога го прашаа каква порака има за народот на Иран, Трамп отсечно одговори: „Треба да се држите до вашата слобода“. Ова е втора ваква закана од Вашингтон во последните пет дена, што сигнализира високо ниво на подготвеност на САД за воена интервенција.