Американскиот претседател Доналд Трамп даде низа исклучително остри коментари за Сомалија и сомалиските мигранти, додека неговата администрација објави дека ги паузира сите апликации за имиграција од 19 неевропски земји, повикувајќи се на националната и јавната безбедност.
Трамп зборуваше за случајот во сојузната држава Минесота, каде што, според локалното правосудство, повеќе од милијарда долари биле исплатени на непостоечки социјални служби преку лажни сметки поврзани со Сомалијци.
Администрацијата на Трамп објави паузирање на обработката на зелени карти и апликации за државјанство од 19 земји, меѓу кои се Авганистан, Иран, Либија, Сомалија, Судан и Венецуела. Официјалниот меморандум ја оправдува одлуката со неодамнешниот напад врз припадници на Националната гарда во Вашингтон, за кој е осомничен Авганистанец.
Меморандумот повикува на „темелно преиспитување“ на сите барања, вклучително и можни интервјуа или повторни интервјуа на кандидатите.
Откако се врати во Белата куќа во јануари, Трамп даде приоритет на построго спроведување на имиграциските закони и најави дека сака „трајно да ја суспендира имиграцијата од сите земји од третиот свет“.