Администрацијата на американскиот претседател Доналд Трамп ѝ навести на Украина дека безбедносните гаранции на САД зависат од тоа дали Киев ќе се согласи на мировен договор, што веројатно би барало од неа да го отстапи регионот Донбас на Русија, објави денес „Фајненшл тајмс“ (FT), повикувајќи се на осум лица запознаени со разговорите.
Вашингтон, исто така, посочи дека би можел да ѝ понуди на Украина повеќе оружје за зајакнување на нејзината мирнодопска војска доколку Киев се согласи да ги повлече силите од делови од источниот регион што го контролира, објави Ројтерс.
Извор запознаен со прашањето изјави дека САД не се обидуваат да наметнат никакви територијални отстапки врз Украина.
САД изјавија дека безбедносните гаранции зависат од тоа двете страни да се согласат на мировен договор, но дека содржината на мировниот договор зависи од Русија и Украина, додаде изворот.
Украинскиот претседател Володимир Зеленски пред два дена изјави дека американскиот документ за безбедносни гаранции за Украина е „100 проценти готов“ и дека Киев сега чека време и место да го потпише.
Киев сака безбедносни гаранции потврдени пред Украина да отстапи која било територија на Русија, а според неименувани извори во „Фајненшл тајмс“, САД веруваат дека Украина мора да се откаже од Донбас за да се стави крај на војната и не вршат притисок врз рускиот претседател Владимир Путин да се откаже од тоа барање.
„Ова е целосно лажно, единствената улога на САД во мировниот процес е да ги зближи двете страни за да постигнат договор“, изјави заменик-портпаролката на Белата куќа, Ана Кели, за „Фајненшл тајмс“.
Кремљ вчера соопшти дека прашањето за територијата останува фундаментално за секој договор за прекин на борбите во Украина.