Американскиот претседател Доналд Трамп изјави дека сите мини поставени во меѓународните води на Ормутскиот Теснец се детонирани или отстранети, додавајќи дека Иран е предупреден дека секој брод што ќе постави нови мини ќе биде уништен.
Трамп рече дека САД го следат „секој квадратен сантиметар“ од стратешки важниот теснец преку своите Вселенски сили. Ормутскиот Теснец е еден од клучните морски патишта за глобалниот транспорт на енергенси.
„Политиката на нулта толеранција за поставување мини е во полн ек“, рече Трамп.
Иако САД и Иран со недели немаат извршено воздушни напади врз меѓусебните воени сили, нападите врз бродови во Ормутскиот Теснец продолжуваат, додека двете страни се борат за контрола врз тесниот морски премин.
Според привремените податоци на компанијата за следење на бродови „Вортекс“, во понеделникот низ теснецот биле транспортирани околу пет милиони барели нафта дневно. Тоа претставува значителен пад во однос на повеќе од 20 милиони барели дневно, колку што изнесувал транзитот пред почетокот на војната.