Судењето за пожарот во дискотеката „Пулс“ во Кочани, во кој загинаа 63 лица, а над 200 беа повредени, досега се одвива без одложување на ниту едно рочиште.
Од почетокот на судскиот процес се одржани вкупно 49 рочишта, од кои 40 во текот на оваа година. До крајот на 2026 година се закажани уште 15 рочишта, информираа денеска од Основниот кривичен суд Скопје.
На 14 септември заврши изведувањето на доказите на Јавното обвинителство. Во досегашниот тек на постапката се изведени 1.390 материјални докази, а сослушани се 45 сведоци и пет вешти лица.
Од 1 октомври треба да продолжи изведувањето на доказите на одбраната, која најавила 244 сведоци.
Во меѓувреме, на 3 октомври истекува законскиот рок за притворот на првообвинетиот Дејан Јованов – Деко. Неговата одбрана најави дека ќе понуди гаранција во имот во вредност од околу 200.000 евра, иако тоа не е задолжително.
Од Кривичниот суд посочија дека за одлуката околу притворот е потребно мислење од Јавното обвинителство, кое досега не е доставено.
„До денеска не се вратени од ОЈО. Нема мислење и ние не можеме да одлучиме. На 3 октомври истекува. Ќе почекаме до петок“, информираа од Судот.
Случајот се наоѓа во доказна постапка и го води судијката Дијана Груевска-Илиевска, додека обвинението го застапува тим од 15 јавни обвинители.
Пожарот во дискотеката „Пулс“ избувна на 16 март 2025 година за време на настап на групата ДНК. Во трагедијата загинаа 63 лица, а над 200 беа повредени.