Дефанзивниот играч на Далас Каубојс, Маршон Ниленд, почина во четврток на само 24-годишна возраст, соопштија клубот и Националната фудбалска лига (НФЛ). Причината за смртта засега не е позната.
Ниленд почина само три дена по натпреварот во кој го постигна својот прв тачдаун во професионалната кариера.
„Со голема тага, Далас Каубојс ја објавуваат трагичната смрт на Маршон Ниленд утрово. Маршон беше сакан соиграч и почитуван член на нашата организација. Нашите мисли се со неговата девојка Каталина и со неговото семејство,“ се наведува во официјалното соопштение на клубот.
Маршон Ниленд беше избран од Далас Каубојс во втората рунда од НФЛ драфтот во 2024 година. Во текот на својата кратка, но ветувачка кариера, одигра 18 натпревари, од кои четири како стартер.
Лигата и тимот најавија дека ќе објават дополнителни информации откако ќе бидат познати резултатите од истрагата за причините за смртта.