Општина Свети Криж Зачретје во Хрватска го прогласи 6 август за Ден на жалост поради трагичниот настан во кој животот го загубија 46-годишен маж и неговите две малолетни деца.
Одлуката за прогласување на Денот на жалост ја донесе општинскиот градоначалник Марко Кос.
По тој повод, сите знамиња пред зградата на општината и објектите под нејзина надлежност се спуштени на половина копје.
Во текот на целиот ден нема да се одржуваат никакви забавни манифестации и програми.
Од општинските власти упатија апел и до сите угостителски објекти и деловни субјекти да го прилагодат своето работење и да искажат почит кон жртвите.
Телата на таткото и двете деца беа пронајдени во саботата, откако избувна пожар во нивната семејна куќа.
Првичната истрага утврди дека пожарот бил намерно подметнат на повеќе локации низ објектот.
Државното обвинителство во Загреб и полициските екипи продолжуваат со истражните дејствија за целосно расветлување на трагичниот случај.