Министерот за внатрешни работи Панче Тошковски во интервју за „360 Степени“ на МРТ 1 ја образложи идејата за воведување паметен систем за постапување во случаи на семејно насилство, со кој државата би можела во реално време да реагира на пријави од жртви.
Тој појасни дека системот би овозможил брза координација меѓу полицијата, здравствените и социјалните служби, со цел најбрз можен одговор и заштита на жртвата.
Тошковски додаде дека идејата вклучува и можност, со согласност на жртвата, преку мобилен телефон да се овозможи аудио и видео снимање како доказен материјал, при што посочи дека сличен систем делумно веќе функционира преку бројот за итни случаи 112.
Во однос на критиките од опозицијата, министерот ги оцени како неосновани и изјави дека станува збор за „сулуда имагинација“.
-Кога говориме, особено за право на живот, не можеш да го компарираш со ниедно друго право. Правото на живот не можеме, пак ќе повторам, да го компарираме со било кое друго право. Така што можноста со еден ваков паметен систем државата да знае каде е жртвата во истиот момент, кои се најблиските полициски службеници што може да се упатат кон жртвата, каде е најбрзата здравствена услуга којашто може да биде дадена, каде е најбрзиот социјален одговор од страна на експерти којшто може да биде даден и така натаму. Да говориме за еден паметен систем којшто, зошто да не, би ги вклучил невладините организации, во делот на одговорот и притоа сето тоа да биде во еден електронски систем којшто ќе треба да биде максимално респонзивен, максимално брзо респонзивен, а притоа секој еден доказ којшто го обезбедуваме веднаш да влезе во рамки на систем кој – не само МВР, и судот, и обвинителството ќе го имаат на дофат на рака. Да не употребувам некои несоодветни зборови, опозицијава што глуми дека е опозиција измислува тези коишто не заслужуваат ни одговор од аспект на пукање на балонот во насока на сеење на страв, сега, ќе се слушало, ќе се злоупотребувало и така натаму… Сакам да потенцирам дека она коешто го говореше опозицијата, ај што не е вистина, туку е една сулуда имагинација за нешто коешто они сакале или не можеле или не знам што друго, имале план или немале план да го реализираат во рамки на нивните научнофантастични филмови – нагласи министерот.