Екстремниот топлотен бран кој во изминатите денови ја зафати Западна Европа и предизвика десетици смртни случаи, сега незапирливо се шири кон источниот дел на континентот. Германија и Италија денеска се соочуваат со екстремно високи температури, а метеоролошкиот систем продолжува да се движи преку германската територија кон Полска, тестирајќи ги сите историски рекорди.
Велика Британија, Франција, Швајцарија и Германија веќе забележаа рекордно високи температури за овој месец. Научниците се децидни дека ваков интензивен топлотен бран би бил практично невозможен без климатските промени предизвикани од човекот, кои се главната причина зошто и ноќните температури неделава се значително повисоки во споредба со периодот од пред две децении.
Во Германија топлотниот бран го достигнува својот пик викендов, потврдуваат метеоролозите. Националната метеоролошка служба соопшти дека е регистриран нов прелиминарен рекорд од дури 41,3 степени Целзиусови во близина на градот Сарбрикен, лоциран до француската граница.
Поради екстремните жештини, издадено е предупредување за речиси целата територија на Германија. Властите упатија итен апел до граѓаните за штедење на водата за пиење. Низ целата земја се очекува просечна температура од 36 степени, со локални пикови кои би можеле да достигнат и до 42 степени Целзиусови.
Ситуацијата е критична и во Италија, каде Министерството за здравство за викендов прогласи црвено предупредување во дури 18 италијански градови. Меѓу нив се Милано, Рим, Торино, Венеција, Џенова, Фиренца и Болоња, каде живата во термометарот се очекува да се искачи до 39 степени.
Во Франција, бранот зад себе остави десетици смртни случаи меѓу младата и постарата популација. Температурите над 40 степени предизвикаа сериозни нарушувања во железничкиот сообраќај и во производството на електрична енергија. Властите беа принудени да воведат привремени забрани за алкохол, целосно да ја прекинат наставата во училиштата и да ги одложат сите закажани настани на open-о.