Зголемениот број сообраќајни незгоди и високите температури изминатиов период донеле поголем број пациенти на Клиниката за ТОАРИЛУЦ. Меѓу повредените има и околу петмина мотоциклисти со посериозни повреди, а лекарите забележуваат и повеќе случаи на колапс поврзани со топлотниот бран.
Директорот на клиниката, д-р Игор Мерџановски, апелира граѓаните да бидат особено внимателни во најтоплиот дел од денот, да го ограничат престојот на отворено и редовно да внесуваат течности.
Говорејќи за влијанието на високите температури врз бројот на пациенти, Мерџановски посочи дека ова лето се регистрираат повеќе случаи на лица кои се онесвестиле или колабирале поради жештините.
Како што објасни, меѓу пациентите има и градежни работници кои паднале додека работеле, лица кои доживеале колапс за време на управување автомобил, но и повозрасни граѓани кои поради високите температури изгубиле рамнотежа, паднале и се здобиле со повреди.
Најчесто кај повозрасните пациенти се констатираат скршеници, за кои во дел од случаите е потребно и хируршко лекување.
Мерџановски ги повика граѓаните, особено во периодот од 11 до 17 или 18 часот, да избегнуваат непотребно изложување на сонце и високи температури. Тој препорача зголемен внес на течности и доследно почитување на препораките од здравствените институции и службите за итна медицинска помош.
Инаку, УХМР и за денеска најави температури до 40 степени. Денеска ќе преовладува сончево и многу топло време, со мала до умерена локална облачност. Во попладневните часови наместа ќе има услови за изолирана нестабилност, проследена со краткотраен пороен дожд и грмежи. Ќе дува слаб до умерен ветер од северен правец.
Минималните температури ќе се движат од 14 до 24 степени, додека максималните ќе достигнат од 32 до 40 степени.
И во наредните денови продолжува периодот на сончево и многу топло време, со мала до умерена локална облачност. На места температурите ќе достигнуваат до 40 степени, а високите температури ќе се задржат и во текот на ноќта.