Топлотниот бран што ја зафати Грција продолжува да носи екстремно високи температури, а особено тешки се условите во Атика, поширокиот регион на Атина, каде што и во доцните вечерни часови температурите достигнаа 32-33 степени Целзиусови.
Според податоците на метеоролошката служба „Метео“ при Националната опсерваторија во Атина, високите температури во комбинација со високата влажност на воздухот создадоа услови на спарина и изразена жештина во грчката метропола.
Мапата објавена од „Метео“ покажува дека во 23.45 часот во повеќе делови од пошироката област Атика температурата била над 30 степени.
Топлотниот бран, според прогнозите, ќе продолжи и во наредните денови. Поради високите температури и многу високата опасност од пожари, за денеска Атика и уште 11 региони во Грција се ставени во состојба на мобилизација, односно Red Code (црвен код).
Мерката опфаќа делови од централна Грција и Евија, Кикладските Острови, како и островите во северниот дел на Егејското Море.
Од Министерството за климатска криза и цивилна заштита на Грција информираа дека при состојба на мобилизација (Red Code) „националниот механизам се става во целосна готовност, со активирање и распоредување на потребниот човечки потенцијал, како и материјални средства и опрема соодветни на потребите“, со цел навремено справување со вонредни состојби.