Насилните антивладини протести во главниот град на Албанија ескалираа во сериозни судири меѓу демонстрантите и полицијата, при што беа запалени неколку државни згради и институции.
Улиците на Тирана станаа место на судири за време на протестите против владата на премиерот Еди Рама, додека безбедносните сили се обидуваа да воспостават ред. Според албанските медиуми, меѓу погодените објекти се зградата на Министерството за инфраструктура и енергетика на чие чело е Белинда Балуку, потоа влезот во Министерството за внатрешни работи, како и Полициската станица број 3 на улицата „Мине Пеза“.
Драматични сцени беа забележани токму во полициската станица каде што избувна пожар во приемниот дел, а според првичните информации, постоеле и сомневања дека во зградомскиот простор имало заробени лица додека полицајците се обидувале да го локализираат пламенот.
За време на повеќечасовните немири и судири со специјалните единици, повредени се неколку полицајци кои со возила на брза помош биле пренесени во болница за укажување лекарска помош. Протестите се проследени и со масовно уништување на јавен и приватен имот.
Иако полицијата интервенираше со солзавец и водени топови за да ги растера демонстрантите и да ги изгаси пожарите, овие протести се оценија како еден од најсериозните бранови на насилство во земјата. Засега официјално не е соопштен точниот број на повредени лица ниту целосниот обем на материјалната штета.