Администрацијата на американскиот претседател Доналд Трамп би можела да добие проширени овластувања во однос на Венецуела, откако САД го прогласија претседателот Николас Мадуро и неговите најблиски сојузници за дел од странска терористичка организација – „Cartel de los Soles“, јавува CNN. Оваа квалификација овозможува дополнителни санкции и поширок спектар на мерки, но не значи автоматско одобрување за употреба на смртоносна сила.
Американски претставници наведуваат дека одлуката отвора пошироки воени опции во рамките на операцијата „Јужно копје“ (Operation Southern Spear), во која во регионот се распоредени повеќе од десетина воени бродови и околу 15.000 американски војници.
Според информациите, Трамп разгледува повеќе можни сценарија: од воени удари врз воени или државни цели во Венецуела, до целосно воздржување од интервенција. Во исто време, високи претставници на американската армија го посетија Порторико, во поддршка на операциите на Карибите.
Анкета на CBS News/YouGov покажува дека 70% од американските граѓани се против употреба на воена сила во Венецуела. Според американски официјален извор, Трамп се надева дека зголемениот притисок ќе го натера Мадуро да се повлече без директна интервенција.
Тензиите дополнително се засилија откако САД изведоа најголема воздушна демонстрација во регионот, а три авиокомпании откажаа летови по предупредување од FAA за „потенцијално опасна ситуација“ во венецуелскиот воздушен простор.