Денешниот ден е регистриран како најжежок од почетокот на годината во Србија, каде живата во термометарот во Кикинда и Чуприја ја достигна границата од 40 степени Целзиусови.
Најтопли региони во текот на денот беа Војводина и Поморавље, додека во главниот град Белград беа измерени високи 39 степени.
Високи температури се забележани дури и на планинските предели, па така на Златибор се измерени 32 степени, во Сјеница 31, а на Копаоник температурата достигнала 25 степени.
Жешкото време продолжува и во текот на вечерта, со измерени 31 степен во Кикинда и 30 степени во Белград, додека на Златибор се евидентирани 25, во Сјеница 20, а единствено на Копаоник вредноста е под 20 степени, односно 19 степени.
Метеоролозите најавуваат дека во Белград и делови од Војводина температурата нема да се спушти под 25 степени ниту во текот на претстојната ноќ.
Утрешниот ден ќе донесе слично, ведро и топло време со температури до 40 степени, со повторен максимум во Војводина и Поморавље, додека во попладневните часови се очекува дестабилизација со локални врнежи во јужните, централните и северните делови.
Веќе во среда најголемиот дел од Србија ќе биде под влијание на облачност со локален дожд и грмотевици, но и натаму ќе се задржи тропски топло време со околу 35 степени и изразена влажност во воздухот.
Продорот на студениот фронт кој доаѓа од Алпите се очекува во четврток навечер, кога температурите во регионот драстично ќе паднат за 15 степени под влијание на засилен северозападен ветер.
Ова долгоочекувано освежување ќе ја спушти температурата на околу 25 степени во повеќето области, проследено со услови за невреме, по што до крајот на неделата ќе преовладува пријатно време со температури под 30 степени.
Метеоролозите во Македонија исто така најавуваат дека од утре попладне до сабота времето ќе биде променливо облачно и нестабилно наместа со повремен дожд и грмежи особено во попладневните часови и во текот на ноќта.
Локално процесите ќе бидат поинтензивни во форма на невреме со пообилен пороен дожд, електрични празнења, силен ветер (над 60 km/h) и појава на град.
Од среда температурите ќе бидат во опаѓање, особено за време на викендот кога ќе дува умерен до засилен северен ветер.