На 64-годишна возраст, денес во својот дом почина Виолета Мојсова, долгогодишна судијка во Основниот суд Велес, која зад себе остави длабока трага во правосудниот живот на градот.
Виолета Мојсова беше истакнат правен професионалец кој повеќе децении посветено ја извршуваше судиската функција во Основниот суд Велес. Со својата стручност, професионалност, интегритет и човечност остави значаен белег во правосудниот систем на Македонија.
Судиска функција извршуваше од декември 1988 година, кога беше избрана за судија во Основниот суд Велес, каде најголем дел од својата кариера работеше во граѓанската област. Како искусен и почитуван судија, во повеќе наврати ја извршуваше и функцијата вршител на должноста претседател на Основниот суд Велес.
Во чест на нејзиниот живот и долгогодишен професионален придонес, утре во Основниот суд Велес ќе се одржи комеморативна седница. Колегите и соработниците ќе ѝ оддадат почит и ќе се потсетат на нејзиниот професионален пат и човечките вредности по кои ќе остане запаметена.
Нејзината смрт претставува голема загуба за семејството, роднините, пријателите, колегите и за сите кои имаа можност да ја познаваат и да соработуваат со неа.
Зад себе остави сопруг и две деца.