По неколкунеделна потрага, полските власти потврдија дека 23-годишниот Никодем Чижевски, познат на интернет како Лил Нарцис, е пронајден мртов во Хрватска. Младиот креатор на содржини последен пат стапил во контакт со своето семејство на 8 април, по што му се изгуби секаква трага.
Полицијата од полскиот град Гливице соопшти дека операцијата за негово пронаоѓање е официјално прекината по добивањето на трагичните информации од хрватските власти.
„Потрагата по младиот жител на нашиот регион е во тек од моментот кога е пријавен за исчезнат. Полицајци од Полициската управа на градот Гливице беа вклучени во операцијата и, со поддршка на претпоставените единици, тие проверија секоја трага и секоја информација што можеше да помогне во утврдувањето на локацијата на овој 23-годишник“, се наведува во полициското соопштение.
Чижевски беше препознатливо име на YouTube сцената со над 450.000 претплатници, познат по своите хумористични видеа и провокативни песни. Иако не беше активен на платформата во последните неколку години, веста за неговата смрт предизвика бран реакции кај неговите обожаватели.
„Почивај во мир, драги мои“ и „Нека почива во мир, најдлабоко сочувство до семејството“, се само дел од пораките кои фановите ги оставаат под неговото последно објавено видео.