Под диригентската палка на Бисера Чадловска, денеска ќе се одржи традиционалниот концерт „Младите доаѓаат“, на кој ќе настапат ученици од државните музички училишта од земјава.
Публиката ќе има можност да ужива во изведби на дела од Моцарт, Хајдн, Роули, Бернштајн, Елгар, Крепен, Капуци и Итуралде, интерпретирани од млади музички таленти кои веќе бележат значајни успеси во своето образование.
На концертот ќе настапат ученици од Државното музичко училиште во Битола, ДМБУЦ „Илија Николовски-Луј“ од Скопје и ДМУЦ Штип, кои ќе се претстават со изведби на пијано, виолончело, саксофон, контрабас и соло пеење.
Ќе настапат Софија Михајловска – пијано ДМУ Битола (III година во класата на проф. Маја Божиновска), Јане Петровски – пијано ДМУ Битола (VIII одд. во класата на проф. Јана Четелева Белевска), Ива Амелија Микулчиќ – пијано ДМБУЦ „Илија Николовски-Луј“, Скопје (V одд. во класата на проф. Билјана П. Таковска) Јана Јованова – пијано ДМУЦ Штип, Ева Малиновска – виолончело ДМБУЦ „Илија Николовски-Луј“, Скопје (II година во класата на проф. Маре Видевска), Јована Јанкуловска и Деница Дена Симјаноска – соло пеење ДМБУЦ „Илија Николовски-Луј“, Скопје (II и IV година во класите на: м-р Наташа Еленова и м-р Гонца Богоромова Краповски), Ада Богоевска – виолончело ДМБУЦ „Илија Николовски-Луј“, Скопје (II година во класата на проф. Александра Јаневска), Леонид Ржаникоски – саксофон ДМУ Битола (III година во класата на проф. Горан Трајковски), Матеј Зимбаков – контрабас ДМБУЦ „Илија Николовски-Луј“, Скопје (I година во класата на проф. Дејан Митровиќ), Александар Ицковски – виолончело ДМБУЦ „Илија Николовски-Луј“, Скопје (IV година во класата на проф. Александра Јаневска) и Стефан Трајановски – саксофон ДМБУЦ „Илија Николовски-Луј“, Скопје (I година во класата на проф. Владимир Трајановски).
Концертот „Младите доаѓаат“ традиционално претставува можност за афирмација на новите генерации музичари и нивно претставување пред пошироката културна јавност.