Скопје од денеска до 26 јуни е домаќин на Четвртата светска конференција за религиски дијалог и соработка, која годинава се одржува под тема „Религијата како оружје на војната: во минатото, сегашноста и иднината“. Конференцијата е во организација на Центарот за интеркултурни студии и истражувања при Филозофскиот факултет во Скопје, при Универзитетот „Св. Кирил и Методиј“.
Свеченото отворање ќе се одржи вечерва во 18 часот во Музејот на македонската борба за самостојност во Скопје, каде ќе се обратат државната секретарка во Министерството за култура и туризам Марија Станчевска Ѓоргова, деканот на Филозофскиот факултет проф. д-р Оливер Бакрески, раководителот на Центарот за интеркултурни студии и истражувања проф. д-р Ратко Дуев, проф. д-р Масимо Интровиње од Италија и неговото Блаженство Архиепископот охридски и македонски и на Јустинијана Прима г.г. Стефан.
Организаторите посочуваат дека конференцијата е една од позначајните меѓународни научни платформи посветени на религискиот дијалог, мирот, толеранцијата и соработката меѓу различните културни и верски традиции.
Во рамки на настанот ќе се одржат пленарни предавања, тематски сесии и дискусии за религијата и современите конфликти, религискиот национализам, миротворството, меѓурелигискиот дијалог, човековите права, културната дипломатија и улогата на религијата во современото општество.
На конференцијата ќе учествуваат 79 професори, научници, истражувачи, верски претставници и дипломати од повеќе земји. Организаторите наведуваат дека на претходните изданија од 2019 до 2025 година учествувале 424 учесници од 48 држави, со што иницијативата се позиционирала како важна платформа за меѓурелигиски и меѓукултурен дијалог во регионот.
Меѓу позначајните учесници се проф. Масимо Интровиње од Италија, основач и директор на Центарот за проучување на нови религии (CESNUR), проф. Пабло Аргарате од Австрија, носител на УНЕСКО катедрата за интеркултурен и меѓурелигиски дијалог за Југоисточна Европа, проф. Џејмс Кеј од САД, поранешен декан и потпретседател на Princeton Theological Seminary, како и други научници од Европа, Азија, Америка и Блискиот Исток.
Конференцијата се реализира со поддршка на Министерството за култура и туризам, Универзитетот „Св. Кирил и Методиј“ во Скопје, Филозофскиот факултет, Македонската православна црква – Охридска архиепископија, Исламската верска заедница, Општина Тетово и други институционални партнери.